Manggaya jo Baju Basalang

L-News,.......

“Pandapek den, mamakai oto dinas untuak pulang kampuang atau balebaran, itu samo jo manyalahgunoan pasilitas negara. Baa manuruik Angah?” Kecek Mak Pono.
“Dari namo se lah jaleh mah Mak. Oto dinas, tantu untuak pai badinas. Kalau kabatulan inyo badinas di kampuang, yo buliah. Tapi kalau hanyo untuak balebaran atau pulang kampuang urusan pribadi dan kaluarga, itu namonyo salah guno,” baitu tanggapan Angah Piyan.
 

“Kecek ka-pe-ka juo bantuak itu Ngah,” kato Mak Pono baliak.
“Pandapek den, mamakai kandaraan dinas nan bukan untuak dinas tamasuak korupsi. Walau nampak sapele, tapi kok dikumpua-kumpua bisa gadang,” kato Udin Kuriak pulo.
“Tapi, kan ado lo kabanggaan bisa mambao oto dinas pulang kampuang tu Mak. Awak pajabaik mah, kan bisa pulo kambang sayok dan mambusuang dado stek tu,” kecek Kari Garejoh pulo.

“Kok den indak bangga gai tu doh. Itu namonyo manggaya jo baju basalang. Baa manuruik Tan Baro?” Baleh Mak Pono sakalian mintak pandapek konco palangkinnyo.
 

“Hahahaha, samo Mak. Di kampuang den juo itu istilahnyo mah. Manggaya jo baju basalang. Samaso bujang-bujang dulu memang banyak nan bantuak itu. Bara-lah ka licin gaya, abuak basikek pakai bitel, sipatu bakilek. Tagak di simpang manggaduah anak gadih urang. Tiok nan lalu, disapo juo, taunyo baju nan dipakai basalang,” kato Uncu Labai.
 

“Tapi kalau pajabaik kan indak itu tujuannyo doh. Den raso indak untuak manggaya-gaya doh, tapi untuak transportasi,” Tacin Barain lah sato pulo.
“Manga musti mamakai oto dinas? Kan tiok-tiok pajabaik tu ado oto pribadi. Itu namonyo cadiak buruak. Oto awak basimpan di garase, tapi oto dinas dipakudo tiok sabanta. Untuak urusan kaluarga atau pribadi oto dinas juo nan dipakai,” baleh Mak Pono.
 

“Kalau inyo indak ado oto baa Mak?” Tanyo Tacin baliak.
“Indak picayo den pajabaik di nagari ko indak punyo oto pribadi. Sabansaik-bansaik dan saluruih-luruih pajabaik, pasti ado oto agak ciek. Pakailah oto itu untuak pulang kampuang atau barirayo, manga mamakai oto dinas,” kato Mak Pono.
“Kok iyo batua-batua indak ado, rental oto. Manga mamakai oto negara,” kecek Angah pulo.
“Bia se lah nak nyo nikmati jabatannyo dari kantua sampai ka dapua Mak. Apolai nan batugas di Jawa atau daerah lain, kan ado lo raso bangga dek kaluarganyo tu, ado oto plat merah tagak di muko rumahnyo,” kato Tacin.
 

“Karano memang manyalahgunoan wewenang kato ka-pe-ka, sarancaknyo pajabaik indak mambao kandaraan dinas untuak pulang kampuang. Indak usahlah manggaya jo baju basalang. Pakailah kandaraan pribadi. Walau buruak, harusnyo pajabaik tu bangga mamakai, karano lai indak jo pitih korupsi dibali. Saandainyo memang indak ado oto atau otonyo dalam kondisi rusak, sarancaknyo dirental se oto atau salang oto kawan,” kato Tan Baro.
 

“Oto kawan ciek ka Piaman nyo Tan. Nan ka Solok jo ka Sijunjuang indak bisa doh,” semba Ajo Tondeh.
“Pado mangecek, rancak kuok Ajo. Mukasuik ambo indak oto kawan tambangan ka Piaman tu doh, tapi mobil teman. Lai tantu mobil teman dek Ajo?” Baleh Tan Baro.
“Hehehehe, jan beghang Tan, bata puaso beko,” sambuang Ajo.
Baitulah ota urang-urang di palanta lapau Uwo Pulin manjalang babuko kapatang. (eSPe St.Soeleman)

Posted in: A1. Seputar Lengayang,E7. Cerita Lucu